Eccuti quì : s’arrizzetti un lighjista è li dissi da mettalu à u provu : "  O Missè chì mi tocca à fà da avè a me parti di vita eternu ? "

Tandu li dissi Ghjesù : "  chì hè ciò chì hè scrittu in a leghji ? Comu a lighjarii pò tù ?"

Li risposi : "A u to Signori u to Diu u tinarè propriu caru in cori e anima toia, da vulellu bè à più pudè in a to menti sana è a u to cumpari quant’è à tè stessu".

Li dissi pò Ghjesù : "Hè bona a to risposta. "

Tandu iddu da muscià a so primura par vulè essa primurosu di ghjustizzia intargheti à Ghjesù : " Ma quali hè pò u me cumpari ? "

Tandu li spiicheti Ghjesù : "  Falaia una parsona da Ghjirusalemma fin’à Ghjiricu è infatta à ùn sò quantu sgarzunotti : u ti spoddani, li dani una trecca è lampatilu culà mal vivu.

Falaia un preti par quiddi loca ; ti vidi à quiddu disgrazziatu è scansa.

Ghjunsi ancu un livita è feci listessi.

Ma eccu chì un samaritanu chì si truvaia par viaghju s’avvicina à l’omu : tempu vistulu li falani i sensi. S’avvicina, li cura i so ferti lampenduli oliu è vinu, l’arreca à un’ustaria è s’innaprimura quant’iddu si pò. U lindumani li porghji à l’ustariaghju dui cinquini d’arghjentu dinduli cusì : " Tratalu comu raghjon’cumanda è s’iddu ti veni più caru ti pagaraghju eiu quand’è voltu. "

Allora, dumandeti Ghjesù : " comu ti pari, hè statu qualissu u cumpari di quidddu chè infatteti à i banditi.

Dissi u Lighjista : " quiddu chì ha fattu da bè incun’iddu. "

Tandu li dissi Ghejsù : "  Va puri è fà cussì ancu tù. "

Lucca, X, 25-37.

Parabula : picculu racontu metaforicu, speccia di fola ch’iddu improda Ghejsù da unu insignamentu murali incù situazzioni di a vita ughjinca.

Lighjista : Ghjudeiu cunniscidori di a Leghji, veni à dì di i testi chì acconciani a vita di a cumminità ghjudeia.

Samaritanu : abbitanti di a Samaria, frusteri pà quiddi di a Ghjudeia. Erani disprizzati i Samaritani da mondi Ghjudei.

Livita : Ghjudeiu, rapprisintanti di a sterpa di Levi, liatu à u servizziu di u Tempiu.

1. Prisintà u testu è fanni un picculu riassuntu.
2. Qual’ sò i parsunaghji prisintati ? Chì sò I so punti de primura ? Chì rapprisintani ?
3. Spiicà parchì Ghjesù sceddi a un Samaritanu da fanni un mudellu pà u Lighjista ?
4. Chì hè u sensu di ssa parabula, à parè vosciu ? Comu vi pari l’attitudina di Ghjesù incù a Leghji ghjudeia ?
5. Parchì si sprimi Ghjesù usendu parabuli ?